Вештини за здравје и благосостојба

Обезбедете едно пакетче кондоми, кое ќе го користите за потребите на приказната. На овој начин Вашето дете/ученик/роднина/корисник ќе може, покрај илустрациите, информациите да ги поврзе со реалниот предмет, во овој случај пакетче со кондоми. Побарајте го датумот до кога кондомот е погоден за користење и покажете го на Вашето дете/ученик/роднина/корисник. Истиот датум треба да биде обележан на кутијата и опаковката на кондомот.

Важно е да нагласите дека момчето и девојката може да имаат секс, а девојката сепак да не остане бремена. При воведување на поимот „кондом“, доколку истиот е тежок за изговарање, тогаш можете истовремено да го користите и терминот „гумичка“. Користете ги и двата поими истовремено. На тој начин, доколку поимот „кондом“ не може да го изговори Вашето дете/ученик/роднина/корисник, сепак ќе го асоцира со поимот „гумичка“.

Доколку постојат и други личности со кои Вашата ќерка/ученичка/роднина/корисничка може да зборува за менување на влошка и може да побара помош од нив (член на семејство, роднина, блиско опкружување) наведете ги и нив. Важно е сепак да се ограничи кругот со кои луѓе може да зборува на конкретната тема и од кои може да побара помош при менување на влошка. Охрабрете ја Вашата ќерка/ученичка/роднина/корисничка на почетокот на првите менструални периоди да носи потемна облека, на која нема да биде видлива дамка од крв, доколку се случи изместување на влошката или протекување на крв на облеката. На овој начин се намалува можноста од непријатни ситуации во јавноста (училиште, надвор од домот и др.).

Од големо значење е да се потенцира одржувањето на лична хигиена за време на менструален циклус. На тој начин се намалува можноста за создавање на промени на кожата во пределот на вагината и задникот, како резултат на несоодветна хигиена. Исто така отстранувањето на непријатната миризба, создадена од крвта и носењето на влошката е важно особено кај лицата кои имаат поголема осетливост на мириси.

За полесно визуелизирање на времето кога треба влошката да се промени, може да користите лепенки (смајли, црвена картија, нацртана влошка и сл.) со кои ќе го обележите часот кога Вашата ќерка/ученичка/роднина/корисничка треба да ја смени влошката, односно да ја одлепи влошката со крв и да стави нова чиста влошка на гаќите. Исто така можете да користите тајмер/аларм кој аудитивно ќе потсети дека е време за промена на влошка.

Согласно можностите на Вашата ќерка/ученичка/роднина/корисничка можете да посочите дека влошката се менува кога поголемиот дел ќе се натопи со крв. Но, земајќи предвид дека интензитетот на течење на менструална крв не е ист кај сите девојки и жени, може да настане ситуација каде и за повеќе од 4-5 часа поголемиот дела од влошката да не биде натопен, со голема можност да се јави непријатна миризба од крвта и долгото носење. Поради тоа се препорачува јасно ограничување на времето на менување на влошката од 3-4 часа после ставањето.

Нагласете дека миењето на рацете, односно одржувањето на лична хигиена при секое менување на влошка е многу важно. Посочете дека миењето на рацете е потребно поради допирањето на гаќите, при менување на влошката.

Нагласете дека е многу важно опаковката и хартијата од влошката да се фрла само во корпата за отпадоци. Согласно можностите на Вашата ќерка/ученичка/роднина/корисничка посочете дека во спротивно, доколку истите ги фрли во шољата, таа ќе се затне. Доколку во WC нема корпа за отпадоци, тогаш посочете ја просторијата во која има корпа за отпадоци, во која може да ги фрли опаковката и хартијата (кујна, надвор пред влезна врата, двор и сл.). Користете модел за демонстрирање (хартија од влошка) за да го претставите движењето, односно фрлањето на хартијата и опаковката од влошката. Демонстрирањето можете да го изведете Вие или на Вашата ќерка/ученичка/роднина/корисничка да примените техника рака врз рака, каде со Вашите раце ги движите рацете на Вашата ќерка/ученичка/роднина/корисничка за таа да ја изведе активноста. На овој начин го поттикнувате моторното учење кај Вашата ќерка/ученичка/роднина/корисничка.

Користете модел за демонстрирање (гаќи и ставена чиста влошка) за да го претставите движењето, односно кревањето на гаќите со наместена влошка. Демонстрирањето можете да го изведете Вие или на Вашата ќерка/ученичка/роднина/корисничка да примените техника рака врз рака, каде со Вашите раце ги движите рацете на Вашата ќерка/ученичка/роднина/корисничка за таа да ја изведе активноста. На овој начин го поттикнувате моторното учење кај Вашата ќерка/ученичка/роднина/корисничка.