Ниво 1

Доколку имате обезбедено кондоми, од кутијата извадете еден неотпакуван кондом. Посочете ги рамната (мазната) страна и рапавата страна на опаковката од кондомот. Дозволете му на Вашето дете/ученик/роднина/корисник со прст да ги допре двете страни, за да може полесно да ја воочи разликата.

Потенцирајте ја важноста од правилно местење на кондомот, односно дека кондомот мора да биде правилно наместен на пенисот за девојката да не остане бремена.

Бидејќи кондомот е направен од гума, истиот може да го именувате и со терминот „гумичка“, доколку поимот „кондом“ е тежок за изговарање. Важно е да нагласите дека кондомот се става на пенисот, која мора да биде тврд, бидејќи во спротивно не може да се стави кондомот. Исто така, важно е да го потенцирате времето кога се става кондомот, односно пред пенисот да ја допре или влезе во вагината. Посочете дека пенисот не треба да ја допре или да влезе во вагината, ако на него нема кондом.

Обезбедете едно пакетче кондоми, кое ќе го користите за потребите на приказната. На овој начин Вашето дете/ученик/роднина/корисник ќе може, покрај илустрациите, информациите да ги поврзе со реалниот предмет, во овој случај пакетче со кондоми. Побарајте го датумот до кога кондомот е погоден за користење и покажете го на Вашето дете/ученик/роднина/корисник. Истиот датум треба да биде обележан на кутијата и опаковката на кондомот.

Важно е да нагласите дека момчето и девојката може да имаат секс, а девојката сепак да не остане бремена. При воведување на поимот „кондом“, доколку истиот е тежок за изговарање, тогаш можете истовремено да го користите и терминот „гумичка“. Користете ги и двата поими истовремено. На тој начин, доколку поимот „кондом“ не може да го изговори Вашето дете/ученик/роднина/корисник, сепак ќе го асоцира со поимот „гумичка“.

Доколку во блиското опкружување на Вашето дете/ученик/роднина/корисник има и други лица со кои тој може да разговара на конкретната тема, тогаш наведете ги и нив (брат, сестра, роднина, другар и сл.).

Нагласете дека таблетата за итна контрацепција девојката треба да ја испие во следните 3 дена по сексот, односно што е можно побрзо. Бидејќи ако поминат три дена од сексот, таблетата за итна контрацепција нема да спречи девојката да остане бремена.

Нагласете дека таблетата за итна контрацепција може да се купи само во аптека. Согласно можностите на Вашето дете/ученик/роднина/корисник наведете дека таблетите за контрацепција не може да се купат во продавница или бензинска пупма како кондомите. Доколку поимот „аптекарка“ претставува предизвик за изговарање и меморирање на Вашето дете/ученик/роднина/корисник применете друг поим кој ќе биде соодветен (продавачка во аптека и сл.).

Важно е да се наведе дека за купување на таблетите девојката мора да има рецепт од доктор/докторка. Докторот или докторката ќе и каже, објасни дали треба или не треба да ја пие таблетата. Ако треба да ја пие ќе и даде рецепт, за да може да ја купи таблетата за итна контрацепција.

Таблетата за итна контрацепција ја пие девојката. Согласно можностите на Вашето дете/ученик/роднина/корисник важно е да потенцирате два аспекти: дека таа една таблета се пие само ако момчето и девојката не спречиле да се создаде бебе на некој од другите начини, опишани претходно (не користеле кондом, девојката не пиела таблети за контрацепција, немала ставено спирала или инекција за контрацепција). Другиот аспект е дека таблетата не треба да се пие често, бидејќи во неа има многу хормони, кои може да и наштетат на девојката. Затоа секој пат пред да ја пие таблетата девојката треба да разговара со доктор/докторка.